O‘zbekistonda odam savdosi va yoshlarni aldov yo‘li bilan xorijga noqonuniy maqsadlarda jo‘natishga urinishlarning oldini olish borasida tezkor tadbirlar davom ettirilmoqda. Bu haqda Zamin.uz xabar berdi.
Navbatdagi holat Namangan viloyatida huquqni muhofaza qiluvchi organlar tomonidan aniqlandi. Tergov jarayonida ma’lum bo‘lishicha, ikki nafar mahalliy ayol ikki nafar yosh qizni chuv tushirib, ularni Turkiyaning Antaliya shahriga fohishalik bilan shug‘ullanish uchun yuborishni maqsad qilgan.
Jinoyatchilar jabrlanuvchilarning ishonchiga kirish orqali ularni xorijda yuqori daromadli ish va’dasi bilan o‘z domiga tortishga uringan. Biroq huquq-tartibot idoralari xodimlari tomonidan amalga oshirilgan tezkor qidiruv-surishtiruv harakatlari natijasida ushbu jinoiy rejaning amalga oshishiga yo‘l qo‘yilmadi.
Hozirgi vaqtda mazkur holat yuzasidan tegishli tartibda jinoyat ishi qo‘zg‘atilib, tergov harakatlari olib borilmoqda. Ushbu voqea yoshlarni turli xil aldovlar va va’dalarga ishonib qolmaslikka, xorijga chiqishda qonuniy tartib-qoidalarga rioya etishga hamda ogohlikka chaqiradi.
Odam savdosiga qarshi kurashish mamlakatdagi jamoat xavfsizligini ta’minlashning ustuvor yo‘nalishlaridan biri bo‘lib qolmoqda.
Izohlar
0