Samarqandda mast haydovchi ishtirokida og'ir YTH sodir bo'ldi
Samarqand viloyatining Jomboy tumanida ikki Gentra rusumli avtomobil to'qnashishi oqibatida yo'l-transport hodisasi qayd etildi. Bu haqda Zamin.uz xabar berdi. Viloyat Yo'l harakat xavfsizligi boshqarmasi bergan ma'lumotga ko'ra, voqea tuman ichki yo'llarining birida yuz bergan. Kuzatuv kameralariga muhrlangan tasvirlarda yuqori tezlikda harakatlangan Gentra yo'l chetida to'xtab turgan xuddi shu rusumdagi boshqa bir mashinaga kelib urilgani ko'rinadi.
To'qnashuv zarbi natijasida to'xtab turgan avtomobil va uning yonida bo'lgan haydovchi bir necha metr masofaga otilib ketgan. Hodisa sodir bo'lgan joy yaqinida ikki nafar bola bo'lgan va ulardan biri so'nggi soniyalarda chetga qochishga ulgurib, omon qolgan.
To'qnashuv oqibatida har ikki transport vositasi haydovchilari turli darajadagi tan jarohatlari bilan shifoxonaga yuborildi. Aybdor haydovchi o'z ko'rsatmasida transport vositasini taxminan 90 km/soat tezlikda va mast holatda boshqarganini tan oldi.
Mazkur holat yuzasidan jinoiy ish qo'zg'atilib, tergov harakatlari olib borilmoqda. Qoidabuzar haydovchiga nisbatan qonuniy choralar ko'rilishi, jumladan, transport vositasini boshqarish huquqidan mahrum etilishi kutilmoqda.
Mutaxassislar haydovchilarni belgilangan tezlik me'yorlariga amal qilishga va spirtli ichimlik iste'mol qilgan holda rulga o'tirmaslikka chaqirmoqda.
