Google Pentagon bilan sun'iy intellekt texnologiyalaridan foydalanish bo'yicha shartnoma imzoladi
Google kompaniyasi AQSh Mudofaa vazirligi bilan hamkorlik o'rnatib, Pentagonning maxfiy tarmoqlari uchun sun'iy intellekt texnologiyalarini taqdim etdi. Bu haqda Zamin.uz xabar berdi. Techcrunch.com nashrining xabar berishicha, mazkur kelishuv barcha qonuniy maqsadlarda foydalanishni ko'zda tutadi. Ushbu qaror Anthropic kompaniyasi Trump ma'muriyati bilan hamkorlik qilishdan bosh tortganidan so'ng qabul qilindi.
Anthropic o'z texnologiyalaridan avtonom qurollar yaratish va ichki ommaviy kuzatuvda foydalanilishiga qarshi chiqib, Pentagon talablarini rad etgan edi. Pentagon rad javobidan so'ng Anthropic kompaniyasini «ta'minot zanjiri uchun xavf» deb e'lon qildi.
Bunday tamg'a odatda xorijiy raqib davlatlarga nisbatan qo'llaniladi. Hozirda tomonlar ushbu masala bo'yicha sudlashmoqda.
Sud jarayoni davomida mazkur tamg'ani qo'llash vaqtincha to'xtatib turilishi haqida qaror chiqarildi. Google kompaniyasining 950 nafar xodimi rahbariyatga ochiq xat yo'llab, Anthropic kabi qat'iy cheklovlar o'rnatishni so'ragan bo'lsa-da, kelishuv baribir imzolandi.
Google vakillarining tushuntirishicha, sun'iy intellekt logistika, kiberxavfsizlik va diplomatik tarjima kabi yo'nalishlarda qo'llaniladi. Kompaniya bayonotida texnologiyalar inson nazoratisiz ishlaydigan avtonom qurollar yaratish yoki ommaviy kuzatuv uchun ishlatilmasligi ta'kidlangan.
Avvalroq OpenAI va xAI kompaniyalari ham Pentagon bilan shunga o'xshash bitimlar tuzgani ma'lum bo'lgan edi.
