Amerikaning Cosmic Aerospace startapi xususiy aviatsiya sektori hamda uchuvchilarni tayyorlash markazlari uchun moʻljallangan toʻrt oʻrinli elektr samolyot loyihasini omma eʼtiboriga havola qildi. Bu haqda Zamin.uz xabar berdi.
Cosmic One deb nomlangan mazkur havo kemasi toʻliq elektr energiyasi bilan harakatlanish xususiyatiga ega. Ixbt.com manbasiga tayanib maʼlum qilinishicha, kompaniya jamoasi ushbu yangi texnologik yechimni ishlab chiqishda AQSh Fuqaro aviatsiyasi federal boshqarmasi (FAA) tomonidan belgilangan zamonaviy talab va qoidalarga tayanmoqda.
Loyihaning asosiy maqsadi samolyotni tegishli xalqaro standartlar asosida sertifikatsiyadan oʻtkazishdan iborat. Ayni paytda muhandislar va konstruktorlar havo kemasini xavfsizlik hamda samaradorlik nuqtayi nazaridan mukammallashtirish ustida ishlamoqda.
Rejaga koʻra, barcha sinov jarayonlari va sertifikatlash bosqichlari muvaffaqiyatli yakunlangach, Cosmic One samolyotlarini xaridorlarga yetkazib berish ishlari 2029-yilda boshlanadi. Ushbu loyiha kichik aviatsiya bozorida ekologik toza transport vositalaridan foydalanishni kengaytirishda muhim qadam boʻlishi kutilmoqda.
Izohlar
0