AQSh maʼmuriyati Afrika qitʼasida faoliyat yurituvchi va amerikalik sarmoyadorlarga tegishli boʻlgan yagona Africell telekommunikatsiya operatorini qoʻllab-quvvatlashga qaror qildi. Bu haqda Zamin.uz xabar berdi.
Rasmiy manbalarga koʻra, mazkur kompaniyaga qariyb 100 million dollar miqdorida imtiyozli kredit ajratish rejalashtirilmoqda. Ushbu moliyaviy yordamning asosiy maqsadi mintaqadagi zamonaviy aloqa infratuzilmasini tubdan yaxshilash va tarmoq qamrovini kengaytirishdan iborat.
Tahlilchilarning fikricha, mazkur tashabbus ortida geosiyosiy manfaatlar ham yotibdi. Xususan, ajratilayotgan mablagʻlar Afrika bozorida oʻz taʼsir doirasini faol ravishda oshirib borayotgan Xitoyning Huawei kompaniyasiga raqobatbardosh muqobil yaratishga xizmat qiladi.
AQSh hukumati mahalliy telekommunikatsiya sektorini moliyalashtirish orqali mintaqada texnologik ustunlikni saqlab qolish va xitoylik ishlab chiqaruvchilarning kengayishiga qarshi kurashishni koʻzlamoqda. Ixbt.com nashrining qayd etishicha, ushbu qadam Vashingtonning Afrika qitʼasidagi raqamli iqtisodiyot va infratuzilma loyihalariga nisbatan yondashuvini oʻzgartirayotganidan dalolat beradi.
Izohlar
0