Apple hamyonbop kompyuterlar bozoriga kirishga tayyorgarlik ko'rmoqda
Apple korporatsiyasi kompyuter texnologiyalari bozorida yangi yo'nalish ochishi kutilayotgan hamyonbop Mac Neo modelini ishlab chiqmoqda. Bu haqda Zamin.uz xabar berdi. Macbook Neo noutbuklarining savdoda erishgan muvaffaqiyatidan so'ng, kompaniya statsionar qurilmalarning eng arzon talqinini taqdim etishga qaror qildi. Computerra.ru nashrining xabar berishicha, yangi kompyuterning narxi taxminan 300 dollar atrofida bo'lishi kutilmoqda.
Insayderlar ushbu qurilmani kundalik bazaviy vazifalarni bajarish uchun eng qulay va arzon yechim sifatida baholamoqda. Qurilmaning asosiy texnik o'ziga xosligi unda mobil protsessordan foydalanilishidir.
Taxminlarga ko'ra, kompyuter iPhone 17 Pro smartfonlariga o'rnatiladigan A19 Pro chipi bilan jihozlanadi. Shuningdek, 12 GB gacha tezkor xotira bilan ta'minlanadigan ushbu model o'qish va ofis ishlari uchun to'liq mos keladi.
Tashqi ko'rinishidan Mac Neo juda ixcham dizaynga ega bo'lib, o'lchamlari bo'yicha Apple TV 4K pristavkasini yodga soladi. Qurilmada faqat ikkita USB-C porti mavjud bo'lishi aytilmoqda.
Mutaxassislar bunday past narxni ayrim funksiyalari cheklangan mobil chiplarni qo'llash orqali ta'minlash mumkinligini ta'kidlamoqda. Yangi mahsulot asosan internetda ishlovchi va hujjatlar bilan band bo'lgan foydalanuvchilar qatlamiga mo'ljallangan.
