Amazon mahsulotlar sahifasiga sun'iy intellekt asosida ishlaydigan audio funksiyani joriy qildi
"Amazon" kompaniyasi elektron tijorat platformasidagi mahsulotlar sahifasiga sun'iy intellekt yordamida ishlovchi audio funksiyani qo'shdi. Bu haqda Zamin.uz xabar berdi. Yangi tizim foydalanuvchilarga tovarlar yuzasidan savollar berish va real vaqt rejimida ovozli javoblar olish imkoniyatini taqdim etadi. Bu haqda Techcrunch.com xabar berdi.
"Join the chat" deb nomlangan mazkur xizmat mijozlarning vaqtini tejashga qaratilgan. Endilikda xaridorlar mahsulotning texnik tavsiflari yoki ko'p sonli foydalanuvchi sharhlarini o'qib chiqishga ehtiyoj sezmaydi.
Sun'iy intellekt mahsulot haqidagi ma'lumotlarni hamda boshqa xaridorlarning fikrlarini tahlil qilib, tabiiy muloqot shaklida ma'lumot yetkazadi. Masalan, xaridor kiyim matosining sifati yoki maishiy texnika vositalarining qulaylik darajasini ovozli so'rov orqali aniqlashtirishi mumkin.
Kompaniya ma'lumotlariga ko'ra, texnologiya har bir savolga mos ravishda suhbatni shakllantiradi va javoblarni takrorlamaydi. Ushbu jarayon do'kondagi tajribali sotuvchi bilan maslahatlashish muhitini yaratishga mo'ljallangan.
Hozirda mazkur funksiya AQSh hududida "Amazon Shopping" ilovasi doirasida sinovdan o'tkazilmoqda. Foydalanuvchilar mahsulot tasviri ostida joylashgan maxsus tugma orqali matnli yoki ovozli muloqotni amalga oshirishlari mumkin.
