Xorijiy internet do'konlar faoliyati ustidan soliq nazorati kuchaytiriladi

O‘zbekistonda elektron tijorat sektorini tartibga solish va xorijiy marketpleyslar orqali amalga oshirilayotgan savdo operatsiyalari ustidan nazoratni kuchaytirish choralari ko‘rilmoqda. Bu haqda Zamin.uz xabar berdi.

Soliq qo‘mitasi tomonidan ishlab chiqilgan yangi tartibga ko‘ra, elektron tijorat operatorlari o‘z tranzaksiyalari va tovar aylanmasiga oid ma’lumotlarni soliq idoralariga taqdim etishi belgilangan. Ushbu tashabbus haqida 18 may kuni Senat majlisida Soliq qo‘mitasi raisi maslahatchisi Yigitali Narziyev ma’lumot berdi.

Uning so‘zlariga ko‘ra, mazkur loyiha prezident farmoni ijrosini ta’minlash hamda raqamli savdo bozorida shaffoflikni qaror toptirish maqsadida amalga oshirilmoqda. Yangi mexanizm joriy etilgach, soliq organlari elektron to‘lovlar va savdo aylanmalari to‘g‘risidagi axborotlarni avtomatlashtirilgan tarzda qabul qilib oladi.

Muhim jihati shundaki, tizimga uzatiladigan ma’lumotlar egasizlantirilgan shaklda bo‘lib, u foydalanuvchilarning shaxsiy ma’lumotlarini emas, balki faqat soliqqa tortish uchun zarur bo‘lgan operatsion ko‘rsatkichlarni qamrab oladi. Shuningdek, xorijiy yuridik shaxslarni O‘zbekiston hududida soliq hisobiga qo‘yish tartibi joriy etilishi rejalashtirilgan.

Bu xorijiy internet-do‘konlarning mamlakatimiz bozoridagi faoliyatini soliq majburiyatlari doirasida muvofiqlashtirishga xizmat qiladi. Agar xorijiy kompaniyalar belgilangan talablarga rioya qilmasa yoki soliq to‘lashdan bosh tortsa, ularning faoliyatini cheklash choralari qo‘llanilishi mumkin.

Ushbu qadam mahalliy tadbirkorlar va xorijiy sotuvchilar uchun teng raqobat muhitini yaratishga qaratilgan. So‘nggi yillarda onlayn savdo hajmining keskin o‘sishi davlat organlaridan mazkur sohani qonuniy va shaffof tarzda boshqarishni talab etmoqda.

Tizimning ishga tushirilishi mahalliy biznes vakillarining manfaatlarini himoya qilish va soliq intizomini mustahkamlashda muhim ahamiyat kasb etadi.