Vashingtonda Tramp ishtirokidagi tadbirda o'q uzgan shaxs ushlandi

Vashingtonda AQSh prezidenti qatnashgan tadbirda o'q uzgan shaxs ushlandi

AQSh prezidenti ishtirok etgan ommaviy tadbirda sodir bo'lgan otishmadan so'ng gumonlanuvchi huquqni muhofaza qilish organlari tomonidan qo'lga olindi. Bu haqda Zamin.uz xabar berdi.

CBS News nashri tarqatgan ma'lumotga ko'ra, 31 yoshli Kouel Allen tergov jarayonida Oq uy ma'muriyati vakillariga nisbatan hujum uyushtirishni maqsad qilganini e'tirof etgan. Shunga qaramay, gumonlanuvchining bevosita davlat rahbariga qarata o'q uzishni niyat qilgani borasida aniq ma'lumotlar berilmagan.

Aniqlanishicha, Allen Vashington shahridagi Washington Hilton mehmonxonasida tashkil etilgan anjumanga tadbir ishtirokchisi sifatida kirishga muvaffaq bo'lgan. Politsiya ma'lumotlariga ko'ra, ushlangan shaxsning yonidan to'pponcha va bir nechta pichoq topilgan.

Dastlabki xulosalarga ko'ra, u hech qanday guruhga a'zo bo'lmagan holda, yakka tartibda harakat qilgan. Gumonlanuvchi mehmonxonaning tadbir o'tkazilayotgan zali kirish qismida bir necha bor o'q uzgani rasman qayd etildi.

Hozirda mazkur holat yuzasidan surishtiruv ishlari davom ettirilmoqda.