Turkiyada yuzdan ortiq yo‘lovchisi bor kema cho‘kib ketdi

Joriy yilning 29 may kuni Turkiyaning Marmaris shahri yaqinida 110 nafar yo‘lovchini olib ketayotgan sayyohlik kemasi cho‘kib ketdi. Bu haqda Zamin.uz xabar berdi.

IHA axborot agentligining xabar berishicha, ushbu favqulodda holat Jannat oroli yaqinidagi dengiz hududida yuz bergan. Kema kapitani suv vositasining korpusiga suv kirayotganini payqagach, uni qirg‘oq tomon yo‘naltirishga uringan.

Biroq, suv sathi kema ichida juda tez ko‘tarila boshlagan va bu rejani amalga oshirishga imkon bermagan. Vaziyatning jiddiyligini anglagan kema ekipaji bortdagi barcha yo‘lovchilarni yaqin atrofdagi boshqa ekskursion katerlarga ko‘chirish bo‘yicha shoshilinch chora-tadbirlarni boshlagan.

Qutqaruv jarayoniga qirg‘oq xavfsizligi xizmati xodimlari ham jalb etilgan. Olib borilgan tezkor harakatlar natijasida kemadagi barcha insonlar sog‘-salomat evakuatsiya qilindi.

Ko‘p o‘tmay, kema to‘liq suv ostiga g‘arq bo‘ldi. Rasmiy ma’lumotlarga ko‘ra, hodisa oqibatida jarohat olganlar qayd etilmadi.

Hozirgi vaqtda mahalliy hokimiyat idoralari mazkur kema halokati sabablarini aniqlash maqsadida surishtiruv va tergov ishlarini olib bormoqda.