Makron: Rossiya, AQSH va Xitoy Yevropa uchun raqobatchi kuchlardir
Fransiya prezidenti Emmanuel Makron xalqaro maydondagi siyosiy vaziyatga to'xtalib, bir qator davlatlar rahbarlari borasida keskin fikrlar bildirdi. Bu haqda Zamin.uz xabar berdi. France 24 telekanali xabariga ko'ra, Fransiya yetakchisi Rossiya, AQSH va Xitoyni Yevropaga nisbatan raqobatlashuvchi kuchlar sifatida tavsifladi. Makron global siyosatda qarama-qarshiliklar ortib borayotganini Gretsiyaga amalga oshirgan tashrifi doirasida alohida qayd etdi.
Uning so'zlariga ko'ra, mazkur mamlakatlar rahbarlari Yevropa mintaqasiga nisbatan qat'iy pozitsiyani egallagan holda faoliyat yuritmoqda. Shuningdek, Emmanuel Makron Donald Trampning siyosiy uslubiga ham baho berdi.
Fransiya prezidenti Trampni ba'zan harakatlarini oldindan taxmin qilib bo'lmaydigan siyosatchi deb atadi. Shunga qaramasdan, Makron AQSH Yevropa ittifoqchilari uchun strategik jihatdan muhim hamkor bo'lib qolishini ta'kidladi.
Global siyosiy muhitda manfaatlar to'qnashuvi kuchayib borayotgan bir paytda, Fransiya rahbari mintaqa yaxlitligini saqlash va tashqi bosimlarga tayyor turish zarurligiga e'tibor qaratdi.
