Turkiyaning Istanbul shahrida joylashgan to‘yxonalardan birida yuz bergan ko‘ngilsiz hodisa oqibatida 33 yoshli Qilich Bo‘riyev vafot etdi. Bu haqda Zamin.uz xabar berdi.
DHA axborot agentligi xabariga ko‘ra, voqea 1 noyabr kuni kechki payt, taxminan soat 23:30 atrofida Istanbulning Kichikchekmeje tumanidagi Kemalpasha mahallasida qayd etilgan. Ma’lum bo‘lishicha, to‘y marosimi davomida ikki guruh o‘rtasida to‘satdan kelib chiqqan ziddiyat janjalga aylanib ketgan.
Mojaro avj olgan pallada noma’lum shaxs Qilich Bo‘riyevning bo‘yin qismiga pichoq bilan jarohat yetkazgan. Olingan tan jarohatlari tufayli jabrlanuvchi voqea joyida hayotdan ko‘z yumgan.
Huquq-tartibot organlari xodimlari tomonidan tezkor surishtiruv ishlari olib borilib, jinoyatni sodir etishda gumon qilingan shaxs qo‘lga olindi. Tergov harakatlari yakunlangach, sud qarori bilan gumonlanuvchiga nisbatan qamoqqa olish tarzidagi ehtiyot chorasi qo‘llanildi.
Hozirda mazkur holat yuzasidan tegishli huquqiy tartibot doirasida tekshiruvlar davom etmoqda.
Izohlar
0