Dubayda qozog'istonlik 22 yoshli yigit umrbod qamoq jazosiga hukm qilindi
Birlashgan Arab Amirliklarida qozog'istonlik yosh fuqaroga nisbatan sud hukmi e'lon qilindi. Bu haqda Zamin.uz xabar berdi. Qozog'iston Tashqi ishlar vazirligi bergan ma'lumotga ko'ra, Dubayning birinchi instansiya sudi 2026 yil 18 mart kuni 22 yoshli yigitni bir qator og'ir jinoyatlarni sodir etganlikda aybdor deb topdi. Sud qaroriga muvofiq, mahkumga umrbod ozodlikdan mahrum qilish jazosi va moliyaviy jarima tayinlandi.
Mahkumning yaqinlari u 2024 yilda Birlashgan Arab Amirliklariga haydovchi bo'lib ishlash uchun ketganini ma'lum qilgan. Ular yigitning aybsizligini va tuhmat qurboni bo'lgan bo'lishi mumkinligini ta'kidlamoqda.
Mazkur holat yuzasidan Alibek Bakayev rasmiy munosabat bildirib, hozirda mahkumni vataniga ekstraditsiya qilish masalasi kun tartibida emasligini aytdi. Bakayevning tushuntirishicha, ayni paytda apellyatsiya jarayoni davom etmoqda va barcha huquqiy bosqichlar yakunlanmaguncha ekstraditsiya bo'yicha qaror qabul qilinmaydi.
Hozirda Qozog'istonning Dubaydagi bosh konsulligi va advokatlar ushbu ish bo'yicha faoliyat olib bormoqda. Konsullik xodimlari fuqaroga zarur huquqiy hamda amaliy ko'mak ko'rsatmoqda.
Vazirlik jarayonni to'liq nazoratga olgan bo'lib, ish Birlashgan Arab Amirliklari qonunchiligi doirasida ko'rib chiqilmoqda.
