Dog‘iston Respublikasining Kaspiysk shahrida Rossiya Federatsiyasi madhiyasi yangrayotgan vaqtda o‘rnidan turishni rad etgan ikki nafar fuqaroga nisbatan ma’muriy ish qo‘zg‘atildi. Bu haqda Zamin.uz xabar berdi.
Sud qaroriga muvofiq, har bir ayolga 2500 rubl miqdorida jarima jazosi tayinlandi. Milliy ramzlarga nisbatan hurmatsizlikda ayblangan shaxslar o‘z xatti-harakatlarini turli sabablar bilan oqlashga urinishdi.
Xususan, ayollardan biri tarbiyasida yosh bolasi borligini ro‘kach qilgan bo‘lsa, ikkinchisi o‘sha vaqtda sog‘lig‘i yomonlashgani bois o‘rnidan tura olmaganini bildirgan. Biroq sud majlisida ko‘rib chiqilgan holatlar va taqdim etilgan vajlar yetarli darajada asosli deb topilmadi hamda sud ularning tushuntirishlarini inobatga olmadi.
Mazkur hodisa yuzasidan The Caucasian Knot nashri ma’lumot tarqatdi. Huquqni muhofaza qiluvchi organlar tomonidan ushbu holat bo‘yicha tegishli protsessual choralar ko‘rildi va qonunbuzarlik uchun belgilangan jarimalar ijrosiga kirishildi.
Izohlar
0