Chilida xizmat iti harbiy tadbirda vitse-admiralni tishlab oldi

Chili harbiy-dengiz kuchlariga qarashli kinologlar markazida o‘tkazilgan bitiruv marosimi kutilmagan va kulgili vaziyat bilan yodda qoldi. Bu haqda Zamin.uz xabar berdi.

Narkotik moddalarni aniqlashga ixtisoslashgan xizmat iti tantanali tadbir jarayonida to‘satdan vitse-admiralning yon cho‘ntagiga yopishib, uni tishlab oldi. Rasmiy protokol doirasida o‘tayotgan ushbu tadbir vaqtida yuz bergan holat barcha ishtirokchilarni taajjubga soldi.

Voqea aks etgan videolavha qisqa fursatda ijtimoiy tarmoqlar orqali tarqalib, internet foydalanuvchilari o‘rtasida qizg‘in muhokamalarga sabab bo‘ldi. Ko‘pchilik foydalanuvchilar mazkur holatni hazilomuz tarzda qabul qilgan bo‘lsa-da, ayrimlar itning bu qilig‘i ostida o‘ziga xos ma’no izlashga harakat qildi.

Yuzaga kelgan shov-shuvlardan so‘ng, Chili harbiy-dengiz floti rahbariyati rasmiy bayonot berishga majbur bo‘ldi. Departament vakillarining tushuntirishicha, sodir bo‘lgan voqea itning yoshligi, fe’l-atvorining shakllanish jarayoni hamda tadbirdagi yuqori darajadagi hayajon bilan izohlanadi.

Rasmiylar ushbu holatda hech qanday yashirin niyat yoki g‘ayritabiiy sabab yo‘qligini ta’kidlab, vaziyatga aniqlik kiritishdi.