AQSHning Tennessi shtatida og‘ir jinoyat sodir etganlikda ayblanib, umrbod qamoq jazosini o‘tayotgan 28 yoshli Jeykob Morli qamoqxona hududidan qochib ketdi. Bu haqda Zamin.uz xabar berdi.
Hozirgi vaqtda huquq-tartibot organlari xodimlari qidiruv ishlarini jadallik bilan olib bormoqda. Mazkur holat yuzasidan Associated Press axborot agentligi tegishli ma’lumotlarni taqdim etdi.
Tennessi shtati Jazoni ijro etish departamenti bergan rasmiy bayonotga ko‘ra, mahbusning qamoqxona ichida yo‘qligi 26 oktyabr kuni kechki soat 23:30 atrofida aniqlangan. Jeykob Morli Tiptonvill shahridagi Northwest Correctional Complex muassasasida saqlanayotgan edi.
U avvalroq o‘z hamkasbini o‘ldirganlikda aybdor deb topilib, umrbod ozodlikdan mahrum etish jazosiga hukm qilingan. Hozirda qidiruv operatsiyasi davom etmoqda, mahalliy politsiya kuchlari mahbusning qayerdaligini aniqlash va uni qo‘lga olish uchun barcha zarur choralarni ko‘rmoqda.
Departament mazkur hodisa yuzasidan tekshiruv boshlagan bo‘lib, qamoqxonadan qochish tafsilotlari hamda xavfsizlik tizimidagi mumkin bo‘lgan kamchiliklar o‘rganilmoqda. Rasmiylar aholini hushyorlikka chaqirib, gumonlanuvchi haqida biron bir ma’lumot bo‘lsa, zudlik bilan huquqni muhofaza qiluvchi organlarga xabar berishni so‘ramoqda.
Izohlar
0