"Udineze" klubi Italiya chempionatida qayd etilayotgan qoniqarsiz natijalarga qaramay, bosh murabbiy Kosta Runyaichga bo'lgan ishonchni saqlab qolmoqda. Bu haqda Euro-football.ru xabar berdi.
ANSA agentligi xabariga ko'ra, klub rahbariyati mutaxassis oldiga vaziyatni o'nglash uchun aniq muddat qo'ymagan. Jamoa o'z maydonida "Milan"ga mag'lub bo'lganiga qaramay, rahbariyat hozircha keskin qarorlar qabul qilish niyatida emas.
"Udineze" xo'jayini Djino Potstso mutaxassis bilan tuzilgan shartnoma muddati yakunlanadigan iyun oyigacha unga imkoniyat berish tarafdori. Ayni damda jamoa A seriyada 10 turdan so'ng atigi 4 ochko jamg'arib, turnir jadvalining quyi qismida bormoqda.
"Udineze"ning mag'lubiyatli seriyasi esa 6 ta o'yinga yetdi. Shunga qaramay, yaqinlashib kelayotgan "Parma" va "Roma"ga qarshi bahslar murabbiyning kelajagi uchun hal qiluvchi ahamiyat kasb etishi mumkin.
Manbalarga ko'ra, klub rahbariyati ehtimoliy nomzodlar ro'yxatini ko'rib chiqqan, biroq hozircha yangi murabbiylar bilan hech qanday rasmiy muzokaralar o'tkazilmagan. Klub rahbariyati vaziyatni barqarorlashtirish uchun Runyaichga ishonch bildirishda davom etmoqda.
Izohlar
0