Myunxenning "Bavariya" klubi kuzatuv kengashi a'zosi Karl-Xayns Rummenigge jamoaning 2023-yilda Harri Keyn bilan imzolagan shartnomasi haqida o'z fikrlari bilan o'rtoqlashdi. Bu haqda Euro-football.ru xabar berdi.
Uning so'zlariga ko'ra, angliyalik hujumchining jamoaga kelib qo'shilishi klub tarixidagi eng muvaffaqiyatli transferlardan biri bo'ldi. "Agar so'nggi 20 yillik faoliyatimizni va amalga oshirilgan transferlarni tahlil qiladigan bo'lsak, Harri Keyn shubhasiz klub tarixidagi eng muhim ikki-uchta xarid qatoridan joy oladi", – deya ta'kidladi Rummenigge.
Funksioner, shuningdek, o'tmishda yo'l qo'yilgan xatolarga ham to'xtalib o'tdi. 2022-yilda o'sha vaqtdagi bosh murabbiy Yulian Nagelsmann va sport direktori Hasan Salixamidjich jamoa sof hujumchisiz ham yuqori natijalarga erisha oladi, deb hisoblashgan.
Biroq, Robert Levandovskining "Barselona"ga ketishi va uning o'rniga Sadio Mane olib kelingani jiddiy xato bo'lib chiqdi. Aynan Harri Keynning transferi hujum chizig'idagi bu bo'shliqni to'ldirishga va muammoni bartaraf etishga xizmat qildi.
Eslatib o'tamiz, Harri Keyn "Tottenxem"dan 95 million yevro evaziga "Bavariya" safiga o'tgan edi. Bugungi kunda tajribali forvard nafaqat Bundesliganing asosiy yulduzlaridan biri, balki 2026-yilgi "Oltin to'p" mukofotiga asosiy da'vogarlardan biri sifatida ham e'tirof etilmoqda.
Izohlar
0