«PSJ» klubi prezidenti Nasser al-Xelaifi jamoasining so'nggi yillarda Chempionlar ligasidagi muvaffaqiyatlari haqida o'z fikrlarini bildirdi. Bu haqda Euro-football.ru xabar berdi.
Parijliklar joriy mavsumda ham Yevropaning eng nufuzli turnirida yarim final bosqichiga qadar yetib kelishdi. Ma'lumot o'rnida ta'kidlash joizki, Luis Enrike shogirdlari o'tgan mavsumda o'z tarixlarida ilk bor ushbu turnir g'olibiga aylanishgan edi.
Undan avvalgi mavsumda esa jamoa aynan yarim final bosqichida o'z yurishini to'xtatgan. Nasser al-Xelaifi «Le Forum» nashriga bergan intervyusida jamoasining barqaror natijalarini yuqori baholadi.
«Ketma-ket uch yil davomida Chempionlar ligasining yarim finalida o'ynash uchun jamoa eng yuqori sport formasida bo'lishi lozim. Bu juda jiddiy yutuq, chunki turnirda raqobat o'ta yuqori va kuchli jamoalar soni ko'p», — deya ta'kidladi klub rahbari.
Yarim final bahslari doirasida «PSJ» Germaniyaning «Bavariya» klubiga qarshi maydonga tushadi. Mazkur jamoalar o'rtasidagi dastlabki uchrashuv 28-aprel kuni Parijda bo'lib o'tishi belgilangan.
Javob uchrashuvi esa 6-may kuni Myunxen shahrida o'tkaziladi. Ikki grand jamoa o'rtasidagi bahs final yo'llanmasi taqdirini hal qilib beradi.
