UFC tashkilotining o‘rta vazn toifasidagi eng taniqli va murosasiz jangchilaridan biri hisoblangan braziliyalik Paulo Kosta promoushen rahbariyati bilan ochiq qarama-qarshilik holatiga keldi. Bu haqda Zamin.uz xabar berdi.
Uzoq vaqtdan buyon o‘zini tashkilotdan ozod etishlarini talab qilib kelayotgan sportchi, nihoyat, o‘z faoliyatida keskin burilish yasashga qaror qildi. Kosta jahon boks olamidagi eng nufuzli promouterlardan biri sanalgan britaniyalik Eddi Xirn bilan agentlik shartnomasini imzolaganini rasman ma’lum qildi.
Ushbu qadam jangchining UFCdagi kelajagi borasida yangi savollarni yuzaga keltirmoqda. Paulo Kosta bungacha tashkilotning shartnomaviy majburiyatlari va moliyaviy shartlaridan noroziligini bir necha bor ochiq bayon etgan edi.
Endilikda boks promouteri bilan hamkorlik o‘rnatilishi, sportchining kelgusida aralash yakkakurashlar doirasidan tashqariga chiqishi yoki promoushen bilan muzokaralarda yangi strategiyani qo‘llashidan dalolat beradi. Hozircha tomonlar hamkorlikning aniq tafsilotlari va uning jangchining UFCdagi faoliyatiga ta’siri haqida batafsil ma’lumot berishmadi.
Kuzatuvchilar ushbu voqeani promoushen va sportchilar o‘rtasidagi munosabatlarning navbatdagi murakkab bosqichi sifatida baholamoqda.
Izohlar
0