Modrich "Milan" bilan shartnoma uzaytirish uchun shartlar qo'ydi

"Milan" klubining markaziy yarim himoyachisi Luka Modrichning jamoa bilan imzolagan amaldagi mehnat shartnomasi joriy yilning iyun oyida yakunlanadi. Bu haqda Euro-football.ru xabar berdi.

Sky Sport Italia nashri jurnalisti Peppe di Stefano xabar berishicha, xorvatiyalik futbolchi italiyan klubi bilan hamkorlikni davom ettirish uchun ikki asosiy shartni qo'ygan. Manbaga tayanib xabar berilishicha, 40 yoshli Modrich uchun Chempionlar ligasida ishtirok etish muhim ahamiyatga ega.

Hozirgi vaqtda "Milan" aynan ushbu turnirga yo'llanma olish uchun kurashmoqda. Bundan tashqari, yarim himoyachi Massimiliano Allegri boshqaruvi ostida o'ynashni istaydi.

Agar ushbu mutaxassis klubni tark etsa, rahbariyat Modrich bilan kontraktni uzaytirish masalasida qiyinchiliklarga duch kelishi mumkin. Sobiq "Real Madrid" futbolchisi 2025-yilning yozida erkin agent maqomida "Milan" tarkibiga qo'shilgan edi.

Joriy mavsumda u jamoa safida 34 ta o'yin o'tkazib, ikkita gol urdi va uchta golli uzatmani amalga oshirdi.