Braziliya terma jamoasi va "Milan" klubining sobiq yarim himoyachisi Kaka Italiya klubining Shuhrat zaliga kiritildi. Bu haqda Euro-football.ru xabar berdi.
Bu haqda A Seriyaning rasmiy ijtimoiy tarmoq sahifalarida ma’lum qilindi. Tantanali marosim "Milan" va "Inter" jamoalari o‘rtasidagi derbi oldidan o‘tkazildi.
Stadionga tashrif buyurgan muxlislar afsonaviy futbolchini qarsaklar bilan kutib olishdi. O‘ziga ko‘rsatilgan bunday yuksak ehtiromdan to‘lqinlangan Kaka ko‘z yoshlarini tiya olmadi.
Eslatib o‘tamiz, braziliyalik futbolchi "rossonerilar" tarkibida 2003-yildan 2009-yilga qadar, shuningdek, 2013/2014-yilgi mavsumda to‘p surgan. U "Milan" safida jami 307 ta uchrashuvda maydonga tushib, 104 ta gol urishga va 81 ta golli uzatmani amalga oshirishga muvaffaq bo‘lgan.
Kaka "Milan" bilan birgalikda Italiya chempioni unvonini qo‘lga kiritgan, shuningdek, UEFA Chempionlar ligasida g‘olib chiqqan. Uning jamoa tarixidagi o‘rni beqiyos bo‘lib, muxlislar hamon uning maydondagi harakatlarini iliq xotiralar bilan yodga olishadi.
Izohlar
0