Fransiya chempionatining 31-turi doirasida «Brest» o'z maydonida «Lans» jamoasini qabul qildi. Bu haqda Euro-football.ru xabar berdi.
Gollarga boy o'tgan uchrashuvda tomonlar 3:3 hisobidagi durangga imzo chekdilar. O'yinning ilk daqiqalaridanoq mezbonlar katta ustunlikka ega bo'lishdi.
Uchrashuvning 7-daqiqasida Joris Shotar tomonidan uzatilgan to'pni Dauda Gvindo raqib darvozasiga joylab, hisobni ochdi. «Brest» hujumlarni to'xtatmadi va 24-daqiqada Lyuka Tusar jamoasining ikkinchi golini urishga muvaffaq bo'ldi.
Birinchi bo'lim yakunlanishi arafasida, aniqrog'i 42-daqiqada Erik Junior Ebimbe hisobni yirik — 3:0 ko'rinishiga keltirdi. Ikkinchi bo'limda esa «Lans» o'yin tizginini o'z qo'liga oldi va irodali o'yin ko'rsatdi.
60-daqiqada Floryan Toven gol urib, hisobdagi farqni qisqartirdi va o'yinga intriga qaytishini ta'minladi. Oradan to'rt daqiqa o'tib, Abdalla Sima mehmonlarning ikkinchi goliga mualliflik qildi.
Uchrashuvning asosiy vaqtiga qo'shib berilgan daqiqalarda esa Allan Sent-Maksimen «Lans»ni mag'lubiyatdan qutqarib qolgan golni urdi. Ushbu durang natijadan so'ng «Brest» 38 ochko bilan musobaqa jadvalida 11-o'ringa ko'tarilib oldi.
«Lans» esa 63 ochko bilan ikkinchi pog'onani saqlab qoldi.
