Gvardiola: «Menga klub borasida juda omad kulib boqgan» «Manchester Siti» bosh murabbiyi Pep Gvardiola Liam Rosenyorning «Chelsi» bosh murabbiyligidan iste’foga chiqarilganiga munosabat bildirdi. Bu haqda Euro-football.ru xabar berdi.
London klubi seshanba kuni «Brayton»ga 0:3 hisobida imkoniyatni boy bergan edi, chorshanba kuni esa klub rahbariyati murabbiy bilan xayrlashganini rasman e’lon qildi. «Uning uchun juda afsusdaman.
Liam ushbu darajada ishlashga to‘la loyiq ekaniga ishonchim komil. Har safar shunday voqealar yuz berganda, o‘z klubim borasida naqadar omadim chopganini o‘ylayman.
Men o‘n yil avval to‘g‘ri ish joyini tanlagan ekanman — bu yerda ajoyib iyerarxiya va yuqori saviyadagi direktorlar faoliyat yuritadi. Bu barqarorlik va bildirilayotgan ishonch juda qadrlidir.
Men baxtli insonman», — dedi Gvardiola «Bernli» ustidan qozonilgan g‘alabadan so‘ng bergan intervyusida. Ma’lumot uchun, Liam Rosenyor «Chelsi» boshqaruviga joriy yilning yanvar oyida kelgan edi.
U o‘shanda iste’foga chiqarilgan Enso Mareskaning o‘rnini egallagan edi. Hozirda londonliklar jamoasiga yangi murabbiy izlanmoqda.
