Myunxenning "Bavariya" klubi chap qanot himoyachisi Rafael Gerreyru jarohati sababli Chempionlar ligasi yarim finali doirasidagi "PSJ"ga qarshi uchrashuvlarda jamoasiga yordam bera olmaydi. Bu haqda Euro-football.ru xabar berdi.
Taniqli insayder Fabritsio Romano bergan ma'lumotga ko'ra, 32 yoshli futbolchi safdan chiqqan va parijliklarga qarshi har ikkala bahsni o'tkazib yuborishga majbur bo'ladi. Germaniya Bundesligasining shanba kuni bo'lib o'tgan "Mayns"ga qarshi o'yinida myunxenliklar bosh murabbiyi Vensan Kompani portugaliyalik futbolchini 57-daqiqada almashtirishga qaror qilgan edi.
Tibbiy ko'riklardan so'ng futbolchining jarohati jiddiy ekani va tiklanish uchun vaqt talab etilishi ma'lum bo'ldi. "Bavariya" va "PSJ" o'rtasidagi dastlabki uchrashuv 28-aprel kuni Parijda bo'lib o'tadi.
Javob o'yini esa 6-may kuni Myunxen shahrida o'tkazilishi rejalashtirilgan. Mazkur juftlik g'olibi final yo'llanmasi uchun Londonning "Arsenal" hamda Madridning "Atletiko" jamoalari o'rtasidagi bahs g'olibi bilan kuch sinashadi.
Ma'lumot uchun, Rafael Gerreyru joriy mavsumda "Bavariya" safida barcha turnirlarda 27 ta uchrashuvda maydonga tushib, o'z hisobiga 6 ta gol va 3 ta samarali uzatmani yozdirib qo'ygan edi. Himoyachining yo'qligi hal qiluvchi bahslar oldidan myunxenliklar uchun jiddiy yo'qotish sifatida baholanmoqda.
