Umumiy ovqatlanish sohasida xodimlarni qisqa muddatga ishga olish soddalashadi

O‘zbekistonda xizmat ko‘rsatish sohasi, xususan, umumiy ovqatlanish, turizm va mehmonxona biznesi vakillari uchun xodimlarni qisqa muddatli asosda rasmiy ishga qabul qilish mexanizmi joriy qilinmoqda. Bu haqda Zamin.uz xabar berdi.

Ushbu yangilik Prezidentning kichik biznes subyektlari uchun qulay iqtisodiy va ma’muriy muhit yaratishga qaratilgan farmonida o‘z aksini topdi. Hujjatga binoan, 2026 yil 1 iyundan boshlab tadbirkorlar mehnat organlarining maxsus mobil ilovasi yordamida xodimlarni soddalashtirilgan tartibda ishga olishi mumkin bo‘ladi.

Mazkur tizim ish beruvchilarga xodimni bir kunlik yoki muayyan qisqa muddatga qonuniy ravishda rasmiylashtirish va unga ish haqini o‘z vaqtida to‘lash imkonini beradi. Bu yangilik ayniqsa bayramlar, turli tadbirlar yoki mavsumiy mijozlar oqimi ortgan paytlarda qo‘shimcha ishchi kuchiga ehtiyoj sezadigan restoran va kafe egalari uchun muhim ahamiyat kasb etadi.

Shu paytgacha ko‘plab tadbirkorlar norasmiy kelishuvlarga majbur bo‘lgan bo‘lsa, endilikda jarayon shaffof va tezkor ko‘rinishga keladi. Soliq qo‘mitasi raisi o‘rinbosari Jahongir Abdiyevning ta’kidlashicha, yangi tartib sohadagi mavjud amaliyotni qonuniy izga soladi.

Bir kunlik yoki bir haftalik muddatga ishga qabul qilish imkoniyati mehnat munosabatlarini tartibga solish bilan birga, xodimlarning huquqlarini himoya qilishga ham xizmat qiladi. Natijada byurokratik to‘siqlar kamayib, mehnat bozori yanada shaffoflashadi va noqonuniy bandlik holatlari qisqaradi.