Mayk Menyan Milan yaqin kelajakda yana yuksalishiga ishonch bildirmoqda

"Milan" klubi darvozaboni Mayk Menyan yakunlangan mavsum natijalaridan qoniqish hosil qilmaganini yashirib o‘tirmadi. Bu haqda Euro-football.ru xabar berdi.

Jamoa chempionatning so‘nggi bosqichlarida Chempionlar ligasi yo‘llanmasini qo‘ldan boy berdi. Fransiyalik posbon ijtimoiy tarmoqlardagi sahifasi orqali jamoaning hozirgi holati va kelajagi borasida o‘z fikrlari bilan o‘rtoqlashdi.

Menyan o‘z murojaatida jamoa oldiga qo‘yilgan maqsadlarga erisha olmaganidan afsusda ekanligini ta’kidladi. U "Milan" muxlislariga ko‘rsatgan doimiy qo‘llab-quvvatlovlari uchun minnatdorlik bildirib, professional sportdagi muvaffaqiyatsizliklar va xafagarchiliklar futbolning ajralmas qismi ekanligini qayd etdi.

Shunga qaramay, darvozabon "Milan" baribir o‘z avvalgi nufuzini tiklashi va yaqin kelajakda yana yuqori marralarni zabt etishiga qat’iy ishonishini bildirdi. Ayni damda futbol jamoatchiligini bir savol qiziqtirmoqda: klubdagi bu "qayta tiklanish" jarayoni Menyan ishtirokida amalga oshadimi yoki fransiyalik posbon faoliyatini boshqa jamoada davom ettiradimi?

Mutaxassislar futbolchini "Milan"ning eng qimmatli aktivlaridan biri deb bilishadi. Shu sababli, unga Angliya Premyer-ligasi klublaridan jiddiy qiziqishlar bo‘layotgani haqida xabarlar tez-tez tarqalmoqda.

Hozircha darvozabonning kelajagi borasida aniq qaror qabul qilinmagan.