Prezident qimmatbaho toshlar savdosiga jiddiy jazolar belgiladi

Prezident Shavkat Mirziyoyev qimmatbaho metallar va toshlarning noqonuniy qazib olinishi va sotilishi uchun jiddiy jazo choralari belgilovchi qonunni imzoladi. Bu haqda Zamin.uz xabar berdi.

O‘RQ-1138-sonli qonun 2026 yil 21 aprelda qabul qilingan bo‘lib, Jinoyat va Ma’muriy javobgarlik to‘g‘risidagi kodekslarga bir qator o‘zgartirishlar kiritdi. Jinoyat kodeksiga kiritilgan yangiliklarga ko‘ra, qimmatbaho metallar yoki toshlarni noqonuniy yo‘l bilan qo‘lga kiritish yoki sotish, agar bunday harakatlar uchun avval ma’muriy jazo qo‘llanilgan bo‘lsa, endi jinoyat hisoblanadi.

Bundan tashqari, kodeksning VIII bo‘limida ushbu tushunchalarning aniq huquqiy ta’rifi ham belgilandi. Ma’muriy javobgarlik to‘g‘risidagi kodeksga muvofiq, bunday qonunbuzarliklar uchun predmetlar musodara qilinadi va 15 sutkagacha ma’muriy qamoq jazosi belgilanadi.

Qamoqqa olish mumkin bo‘lmagan shaxslar uchun jarima miqdori bazaviy hisoblash miqdorining 10 barobaridan 20 barobarigacha. Qonun rasmiy e’lon qilingan kundan boshlab kuchga kirdi.