Oʻzbekistonda 2026 yil mart oyida yengil avtomobillar bozorida sezilarli faollik kuzatildi. Bu haqda Zamin.uz xabar berdi. Iqtisodiy tadqiqotlar va islohotlar markazi maʼlumotlariga koʻra, bir oydagi sotuvlar 78 ming donadan oshib, oʻtgan oyga nisbatan 19 foizga, oʻtgan yilning shu davriga nisbatan esa 20,6 foizga oshdi. Bozor deyarli barcha hududlarda jonlandi, faqat Jizzax, Andijon va Samarqand viloyatlarida biroz pasayish qayd etildi.
Surxondaryo viloyatida savdo hajmi 51,4 foizga oshdi, Toshkent viloyatida 46 foizlik, Sirdaryo va Navoiyda mos ravishda 34,5 va 27,5 foizlik oʻsish kuzatildi. Poytaxt Toshkent shahrida bozor faolligi bir oyda 60,5 foizga koʻtarildi.
Birlamchi bozorda yangi avtomobillar savdosi 31 ming donaga yaqin boʻlib, oyiga 13 foizdan, yilga 37 foizga oʻsdi. Mahalliy ishlab chiqarilgan avtomobillar sotuvi 25 ming donaga yaqinlashdi, xorijda ishlab chiqarilgan yangi avtomobillar segmentida esa sotuvlar bir oyda ikki baravar oshib, 5,7 ming donani tashkil etdi.
Ikkilamchi bozorda ishlatilgan avtomobillar savdosi 47,5 ming donani tashkil etib, oylik oʻsish 23 foizni, yillik oʻsish 12 foizni tashkil etdi. Elektromobillar bozori ham izchil rivojlandi.
Mart oyida ularning savdosi 5,5 ming donaga yetib, oʻtgan yilga nisbatan 24 foizga oshdi. Xorazm viloyatida elektr avtomobillar sotuvi besh baravar, Navoiy, Jizzax va Fargʻona viloyatlarida esa mos ravishda 3,6, 2,9 va 2,2 baravar koʻpaydi.
