Aktyor Musulmon Yunusov Ayol qalbi ko‘rsatuvida oila institutidagi o‘zaro munosabatlar, xususan, er va xotinning oila oldidagi mas’uliyati xususida o‘z qarashlarini bayon qildi. Bu haqda Zamin.uz xabar berdi.
Uning fikricha, oilaviy xotirjamlik va barqarorlik ko‘p jihatdan erkak kishining o‘z burchlarini qay darajada ado etishiga bog‘liq. Yunusov erkak o‘z zimmasiga yuklatilgan vazifalarni to‘liq va sifatli bajargan taqdirda, ayol kishi ham tabiiy ravishda o‘ziga xos mas’uliyatlarni bajarishga intilishi hamda oiladagi o‘rnini anglashini ta’kidlab o‘tdi.
Suhbat davomida aktyor erkak kishining oila boshlig‘i sifatidagi o‘rni muhim ahamiyat kasb etishini alohida qayd etdi. Uning so‘zlariga ko‘ra, agar erkak o‘zining barcha erkaklik vazifalarini mukammal darajada bajarsa, ayol kishi ham uyalgan holda, o‘zining oilaviy majburiyatlarini sidqidildan bajarishga kirishadi.
Aksincha, erkak kishi o‘z vazifalarini to‘la-to‘kis ado etmasa, ayol kishi vaziyat taqozosi bilan majburiy ravishda muayyan ishlarni zimmasiga olishga majbur bo‘ladi. Bu holat esa oilaviy munosabatlarda muvozanatning buzilishiga olib kelishi mumkinligini anglatadi.
Yunusovning bu mulohazalari oiladagi o‘zaro hurmat va mas’uliyat taqsimoti borasida muhim mavzularni o‘rtaga tashladi.
Izohlar
0