Bir guruh taniqli sanʼatkorlar davlatning yuksak mukofotlari bilan taqdirlandi

O‘zbekiston Respublikasi Prezidenti Shavkat Mirziyoyevning madaniyat, san’at va adabiyot sohalari vakillarini mukofotlash to‘g‘risidagi tegishli farmoni e’lon qilindi. Bu haqda Zamin.uz xabar berdi.

Mazkur hujjatga binoan, o‘zbek madaniyati va san’atini rivojlantirishga munosib hissa qo‘shib kelayotgan bir guruh ijodkorlar davlatning yuksak mukofotlari bilan taqdirlandi. Xususan, taniqli san’atkorlar Munisa Rizayeva hamda Otabek Muhammadzohid “O‘zbekistonda xizmat ko‘rsatgan artist” faxriy unvoniga sazovor bo‘lishdi.

Shuningdek, G‘iyos Boytoyev, Rustam G‘oipov, Matyoqub Matchanov, Uchqun Tillayev hamda Ra’no Yarasheva “O‘zbekiston Respublikasi xalq artisti” unvoni bilan taqdirlandi. Davlat mukofotlari doirasida Erkin Komilov va Yodgor Sa’diyev “Buyuk xizmatlari uchun” ordeni bilan, Ubaydulla Omon hamda Begzod Muhammadkarimov esa “Fidokorona xizmatlari uchun” ordeni bilan mukofotlandi.

Shuningdek, Elyor Nosirov, Mahmud Namozov va Tohir Sodiqov “Mehnat shuhrati” ordeniga loyiq deb topildi. Anvar G‘aniyev, Ulug‘bek Qodirov hamda Alisher Uzoqov esa “Do‘stlik” ordeni bilan taqdirlandi.

Ro‘yxatdagi boshqa ko‘plab ijodkorlar ham o‘zlarining madaniyat sohasidagi samarali faoliyatlari uchun davlatning yuksak e’tirofiga sazovor bo‘lishdi.