Toyota Rossiyada oʻz savdo belgilarini qayta roʻyxatdan oʻtkazdi

Toyota kompaniyasi Rossiya bozorini tark etganiga qaramay, Rospatent idorasida uchta savdo belgisini qayta roʻyxatdan oʻtkazdi. Bu haqda Zamin.uz xabar berdi.

Ushbu hujjatlar RAV4, bZ hamda Aygo nomlariga tegishli boʻlib, 2025-yil 31-mart sanasida rasmiylashtirilgan. Ixbt.com manbasiga koʻra, mazkur arizalar XMTKning 12-toifasi, yaʼni transport vositalari yoʻnalishini qamrab oladi va olingan eksklyuziv huquqlar 10 yil muddatga amal qiladi.

Mutaxassislar ushbu qadamni brendning Rossiya bozoriga qaytishi sifatida emas, balki intellektual mulkni himoya qilish va nomlardan uchinchi shaxslar tomonidan ruxsatsiz foydalanishning oldini olish chorasi sifatida baholamoqda. Eslatib oʻtamiz, yapon avtomobil ishlab chiqaruvchisi 2022-yilning sentyabr oyida Sankt-Peterburgdagi zavodi faoliyatini toʻxtatgan edi.

Yillik quvvati 100 ming donaga teng boʻlgan ushbu korxona bugungi kunda AGR kompaniyasi tasarrufida boʻlib, u yerda Esteo MX krossoveri yigʻilmoqda. Mazkur model 197 ot kuchiga ega 2,0 litrli dvigatel, 8 pogʻonali avtomat uzatmalar qutisi hamda toʻliq uzatmali tizim bilan jihozlangan boʻlib, uning interyeri uchta zamonaviy ekran bilan boyitilgan.