Tailanddan kelgan yigit yetti kilogramm mefedron bilan qo‘lga olindi

Tailanddan yurtimizga uchib kelgan 19 yoshli fuqaroning yuki bojxona nazoratidan o‘tkazilganda, qonunbuzarlik holati aniqlandi. Bu haqda Zamin.uz xabar berdi.

Tekshiruv jarayonida yo‘lovchiga tegishli chamadonda quruq sut ko‘rinishida qadoqlangan shubhali moddalar borligi ma’lum bo‘ldi. Ekspertiza xulosalariga ko‘ra, ushbu modda og‘irligi 7 kilogrammdan ortiq bo‘lgan mefedron sintetik giyohvandlik vositasi ekanligi tasdiqlandi.

Dastlabki surishtiruv ishlarida aniqlanishicha, gumonlanuvchi shaxs taqiqlangan yukni belgilangan manzilga yetkazib berish evaziga 1000 dollar miqdorida haq olishi kerak bo‘lgan. Hozirgi vaqtda huquq-tartibot organlari tomonidan ushbu jinoyatning barcha tafsilotlarini aniqlash bo‘yicha tezkor-qidiruv tadbirlari davom ettirilmoqda.

Shuningdek, giyohvandlik vositasining kelib chiqish manbasi va mazkur noqonuniy harakatga aloqador bo‘lishi mumkin bo‘lgan boshqa shaxslarni aniqlash choralari ko‘rilmoqda. Mazkur holat yuzasidan tegishli moddalar bilan jinoyat ishi qo‘zg‘atilib, tergov harakatlari olib borilmoqda.

Fuqarolarning bunday noqonuniy xatti-harakatlarga qo‘l urishi og‘ir jinoiy javobgarlikni keltirib chiqarishi yana bir bor eslatib o‘tiladi.