Ijtimoiy tarmoqlarda tarqalgan navbatdagi video lavha jamoatchilikning keskin noroziligiga sabab bo‘lmoqda. Bu haqda Zamin.uz xabar berdi.
Qashqadaryo viloyatida sodir bo‘lgan ushbu holatda ikki nafar yigitning hayvonga nisbatan o‘ta shafqatsiz munosabatda bo‘lgani aks etgan. Tasvirlardan ma’lum bo‘lishicha, ular itni Muravey rusumli motorollerga bog‘lab, harakatlanayotgan transport vositasi ortidan sudrab ketishgan.
Videoning boshlang‘ich qismlarida itning motoroller ortidan yugurishga harakat qilayotgani ko‘rinadi, ammo keyingi kadrlarda hayvonning harakatsiz holatga kelib qolganiga qaramasdan, uni asfalt yo‘l bo‘ylab sudrashda davom etishgan. Ushbu voqea hayvonlarga nisbatan shafqatsiz munosabatda bo‘lish holatlari jamiyatda hanuzgacha uchrayotganini ko‘rsatadi.
Hozirgi kunda mazkur holat yuzasidan tegishli organlar tomonidan surishtiruv ishlari olib borilishi va aybdorlarga nisbatan qonuniy chora ko‘rilishi kutilmoqda. Hayvonlarga nisbatan bunday qilmishlar qonunchilikda belgilangan tartibda jazolanishi lozim bo‘lgan salbiy hodisa hisoblanadi.
