Prezident sovg‘asi ixtirochi qiz Ayzada Asanovaga topshirildi

Ijtimoiy tarmoqlarda Prezident sovg‘asi yozuvi tushirilgan Volkswagen rusumli avtomobil aks etgan fotosuratlar keng muhokamalarga sabab bo‘ldi. Bu haqda Zamin.uz xabar berdi.

Foydalanuvchilar ushbu transport vositasi O‘zbekiston milliy terma jamoasi futbolchilariga taqdim etilgani haqida taxminlarni ilgari surishgan edi. Biroq, rasmiy manbalar mazkur xabarlarni tasdiqlamadi.

Aniqlanishicha, mazkur avtomobil sportchilarga emas, balki iqtidorli yosh ixtirochi Ayzada Asanovaga sovg‘a qilingan. Taqdirlash marosimi Olimpiya shaharchasida davlat rahbarining yoshlar bilan o‘tkazgan uchrashuvi doirasida bo‘lib o‘tdi.

Ayzada Asanova o‘zining ilmiy va texnik ishlanmalari bilan yoshlar o‘rtasida alohida ajralib turadi. Davlat rahbari tomonidan ushbu ixtirochi qizga ko‘rsatilgan e’tibor yoshlarning innovatsion g‘oyalarini qo‘llab-quvvatlash hamda ularni rag‘batlantirish maqsadida amalga oshirilgan.

Shu tariqa, tarmoqlarda tarqalgan taxminlarga oydinlik kiritilib, avtomobilning haqiqiy egasi kimligi jamoatchilikka ma’lum qilindi.