Tailand hukumati joriy yilning 15 sentyabr sanasidan boshlab O‘zbekiston fuqarolari uchun amal qilib kelgan 60 kunlik vizasiz rejimni to‘xtatishga qaror qildi. Bu haqda Zamin.uz xabar berdi.
Ushbu yangi tartibga ko‘ra, mazkur sanadan e’tiboran Tailand hududiga sayyohlik maqsadida tashrif buyurmoqchi bo‘lgan o‘zbekistonliklar safar oldidan viza hujjatlarini rasmiylashtirishlari talab etiladi. O‘zbekiston Respublikasining Bangkok shahridagi Bosh konsulxonasi tomonidan taqdim etilgan ma’lumotlarga tayanadigan bo‘lsak, endilikda Tailandga kirishni rejalashtirayotgan hamyurtlarimiz mamlakatning rasmiy elektron viza tizimi orqali tegishli ruxsatnomani olishlari zarur bo‘ladi.
Mazkur o‘zgarishlar sayyohlik oqimini tartibga solish va viza siyosatini yangilash doirasida amalga oshirilmoqda. Shu bois, Tailandga yo‘l oladigan fuqarolarimizdan safarni rejalashtirish chog‘ida viza talablari va hujjatlarni topshirish muddatlarini oldindan inobatga olishlari so‘raladi.
Qo‘shimcha ma’lumotlar va texnik tafsilotlar bilan diplomatik vakolatxonaning rasmiy axborot manbalari orqali tanishib borish tavsiya etiladi.
Izohlar
0