To'raqo'rg'onda Lacetti soyga tushib ketdi: 2 kishi qutqarildi
25 aprel kuni Namangan viloyatining To'raqo'rg'on tumanida og'ir yo'l-transport hodisasi qayd etildi. Bu haqda Zamin.uz xabar berdi. Favqulodda vaziyatlar vazirligi bergan ma'lumotga ko'ra, Lacetti rusumli yengil avtomobil harakat davomida boshqaruvni yo'qotgan. Hodisa tumandagi "Oqtosh" mahallasi hududida yuz bergan bo'lib, transport vositasi yo'ldan chiqib ketishi natijasida yaqin atrofdagi soyga qulagan.
Mazkur holat yuzasidan viloyat Favqulodda vaziyatlar boshqarmasiga "112" qisqa raqami orqali shoshilinch xabar kelib tushgan. Qutqaruvchilar guruhi voqea joyiga zudlik bilan yetib borib, qidiruv-qutqaruv ishlarini tashkil etdi.
Mazkur jarayonda hududdagi ko'ngilli fuqarolar ham faol ishtirok etib, mutaxassislarga yaqindan yordam berdi. Amalga oshirilgan tezkor harakatlar natijasida avtomobil salonida qolib ketgan ikki nafar fuqaro chiqarib olindi.
Jabrlanganlar xavfsiz hududga olib o'tilib, birinchi yordam ko'rsatish uchun tibbiyot xodimlariga topshirildi. Mutasaddilar barcha haydovchilardan yo'llarda harakatlanish qoidalariga qat'iy rioya qilishni hamda murakkab transport sharoitlarida hushyorlikni oshirishni so'ramoqda.
