Mirobod tumanida transformator yonishi sababli elektr ta’minoti uzildi

3 iyul kuni Toshkent shahrining Mirobod tumanida joylashgan elektr ta’minoti tizimida favqulodda holat kuzatildi. Bu haqda Zamin.uz xabar berdi.

Tuman hokimligi tomonidan taqdim etilgan rasmiy axborotga ko‘ra, yong‘in Banakotiy ko‘chasidagi 198-uy manzilida o‘rnatilgan 23-23-sonli transformator punktida sodir bo‘lgan. Dastlabki tekshiruvlar va mutaxassislar xulosasiga ko‘ra, hodisaga yuqori kuchlanishli kabel tarmog‘ida yuzaga kelgan qisqa tutashuv sabab bo‘lgan.

Voqea joyiga zudlik bilan yong‘in-qutqaruv guruhlari jalb etilib, yong‘in qisqa vaqt ichida bartaraf etildi. Hozirgi vaqtda hududda elektr energiyasini qayta tiklash va texnik nosozlik oqibatlarini bartaraf etish bo‘yicha ta’mirlash ishlari olib borilmoqda.

Rasmiylar mazkur hodisa oqibatida hech kim tan jarohati olmaganligini ma’lum qildi. Ayni damda mutaxassislar tomonidan yong‘in kelib chiqishining aniq sabablari va texnik holat yuzasidan qo‘shimcha o‘rganishlar davom ettirilmoqda.

Aholi va hududdagi obyektlarning elektr ta’minotini barqarorlashtirish uchun barcha zarur choralar ko‘rilmoqda.