Geolokatsiya maʼlumotlari AQSH harbiylari uchun jiddiy xavf tugʻdirmoqda

AQSH Mudofaa vazirligi jang maydonidagi harbiy xizmatchilarning tijoriy geolokatsiya maʼlumotlari orqali kuzatuv ostiga olinganini va nishonga aylanganini rasman tasdiqladi. Bu haqda Zamin.uz xabar berdi.

Techcrunch.com nashri tarqatgan maʼlumotlarga koʻra, mazkur holat zamonaviy smartfon hamda kompyuterlar orqali yigʻiladigan shaxsiy axborotlar milliy xavfsizlik uchun qanchalik jiddiy xavf tugʻdirishi mumkinligini koʻrsatib berdi. Senator Ron Wyden tomonidan taqdim etilgan hujjatlarda AQSH Markaziy qoʻmondonligi dushman kuchlar sotib olingan joylashuv maʼlumotlaridan foydalangan holda harbiy xizmatchilarni kuzatayotganidan xabardor ekani qayd etilgan.

Qoʻmondonlik bunday xavfli amaliyotlar haqida bir necha bor ogohlantirish olganini maʼlum qildi. Tahlillarga koʻra, ushbu turdagi maʼlumotlar koʻpincha onlayn reklama tizimlari tomonidan toʻplanadi va keyinchalik maʼlumot brokerlari vositasida ochiq bozorda sotuvga chiqariladi.

AQSH hukumati va harbiy idoralari ham oʻtmishda shunday maʼlumotlarni sud ruxsatisiz xarid qilgan holatlar kuzatilgan. FBI soʻnggi yillarda fuqarolarni ilovalar va veb-saytlar toʻplaydigan maʼlumotlar hajmini qisqartirish uchun reklama bloklovchi dasturlardan foydalanishga chaqirib kelmoqda.

Senator Ron Wyden Reuters agentligiga bergan intervyusida reklama texnologiyalari sohasini milliy xavfsizlikka tahdid sifatida baholash hamda tegishli tartibga solish choralarini koʻrish fursati yetganini taʼkidladi.