Corgi startapi qisqa vaqt ichida o‘z qiymatini ikki baravarga oshirdi

Sug‘urta texnologiyalari bozorida faoliyat yurituvchi Corgi startapi B1 seriyali investitsiya bosqichi yakunlangani va 106 million dollar mablag‘ jalb qilinganini ma’lum qildi. Bu haqda Zamin.uz xabar berdi.

Ushbu moliyaviy bitim natijasida kompaniyaning bozor qiymati 2,6 milliard dollarga tenglashdi. Techcrunch.com nashrining qayd etishicha, mazkur natija diqqatga sazovor, chunki atigi uch hafta muqaddam startap 1,3 milliard dollar baholash bilan 160 million dollar sarmoya qabul qilgan edi.

Corgi asosan yosh kompaniyalar uchun kiberxavfsizlik va umumiy javobgarlik kabi yo‘nalishlarda sug‘urta yechimlarini taklif etadi hamda Deel va Artisan kabi yirik brendlar bilan hamkorlik qiladi. Qisqa muddat ichida kompaniya qiymatining ikki barobarga oshishi venchur bozorida noodatiy holat hisoblanib, ekspertlar o‘rtasida turli fikrlarni keltirib chiqardi.

Kindred Ventures vakili Kanyi Macqubela o‘sishni yuqori rivojlanish sur’atlari bilan bog‘lagan bo‘lsa-da, ayrim investorlar bunday ichki baholash usullariga nisbatan ehtiyotkor munosabatda. Ularning ta’kidlashicha, real daromad yoki likvidlik ta’minlanmagan sharoitda qog‘ozdagi qiymatning o‘sishi portfel ko‘rsatkichlarini sun’iy ravishda yuqori ko‘rsatishi mumkin.

2024-yilda Emily Yuan va Nico Laqua tomonidan asos solingan Corgi kompaniyasi zamonaviy xatarlarni sug‘urtalashga ixtisoslashgan. Xususan, sun’iy intellekt tizimlari bilan bog‘liq moliyaviy yo‘qotishlar, axborot xavfsizligi hamda operatsion nosozliklar kabi masalalar kompaniya xizmatlari doirasiga kiradi.

An’anaviy sug‘urta bozori ko‘pincha bunday yangi turdagi xatarlarni qamrab olmagan. Nico Laquaning so‘zlariga ko‘ra, sug‘urta sohasi katta investitsiyalarni talab qiladi.

Yangi mahsulotlarni ishlab chiqish, hamkorliklar doirasini kengaytirish va AI-native platformasini rivojlantirish xarajatlari ketma-ket moliyalashtirish raundlarini o‘tkazish zaruriyatini yuzaga keltirgan.