OpenRouter kompaniyasi bir yil ichida milliard dollarlik marrani zabt etdi

2023-yilda tashkil etilgan suniy intellekt texnologiyalari platformasi OpenRouter rivojlanishning yangi bosqichiga qadam qoydi. Bu haqda Zamin.uz xabar berdi.

Kompaniya Alphabet korporatsiyasiga qarashli CapitalG venchur fondi ishtirokida o‘tkazilgan investitsiya raundida 113 million dollar miqdorida mablag‘ jalb qildi. Garchi startap rahbariyati kompaniyaning aniq bozor qiymatini rasman e’lon qilmagan bo‘lsa-da, The New York Times nashri tahlillariga ko‘ra, loyihaning umumiy bahosi 1,3 milliard dollarga yetgan.

Ushbu ko‘rsatkich o‘tgan yilgi 547 million dollarlik baholash bilan solishtirganda sezilarli o‘sishni ifodalaydi. Eslatib o‘tamiz, o‘tgan yili Andreessen Horowitz va Menlo Ventures kompaniyalari boshchiligidagi A seriyali moliyalashtirish jarayonida 40 million dollar to‘plangan edi.

So‘nggi bir yil ichida suniy intellekt sohasidagi ustuvorliklar o‘zgardi. Endilikda asosiy e’tibor modellarni o‘qitish emas, balki ularni amaliyotda samarali qo‘llash hamda agentlar yaratishga qaratilmoqda.

OpenRouter aynan shu o‘zgarishlar fonida o‘z o‘rnini mustahkamlab oldi. Platforma foydalanuvchilar va korxonalarga xarajatlarni optimallashtirish hamda aniqlik darajasini oshirish uchun turli vazifalarga mos modellarni tanlash imkonini bermoqda.

Hozirgi kunda servis Anthropic, Google, OpenAI, xAI va DeepSeek kabi yetakchi provayderlarning 400 dan ortiq suniy intellekt modellariga kirish imkoniyatini taqdim etadi. Kompaniya taqdim etgan ma’lumotlarga ko‘ra, platformaning global foydalanuvchilari soni 8 million nafarga yetdi.

Tizim orqali oyiga 100 trillion token qayta ishlanmoqda, bu esa atigi olti oy avvalgi natijadan besh baravar ko‘pdir. Ushbu muvaffaqiyat bozorda kompaniyalar bitta model yetkazib beruvchisiga to‘liq bog‘lanib qolishni istamasligini va ko‘p modelli ekotizimlar zamonaviy texnologik muhitning ajralmas qismiga aylanganini tasdiqlaydi.