Janubiy Koreyaning Inchxon shahrida yashovchi 60 yoshli fuqaro kutilmaganda yirik miqdordagi pul mablag‘iga duch keldi. Bu haqda Zamin.uz xabar berdi.
Voqea joriy yilning 10 fevral kuni Inchxon shahrining Jemulpo-gu hududi, Gimgok-dong dahasidagi ko‘p qavatli turar joy binosi yaqinida sodir bo‘lgan. Erkak chiqindilarni saralash jarayonida 20 litrlik polietilen qop ichida yashirilgan 25 million von (taxminan 18,7 ming dollar) miqdoridagi naqd pulni topib olgan.
Mazkur holat yuzasidan huquq-tartibot organlariga xabar berilgan va qonuniy tartibda surishtiruv ishlari boshlangan. Koreya qonunchiligiga ko‘ra, topib olingan mol-mulk olti oy davomida egasi aniqlanmasa, uni topgan shaxsga o‘tkazib berilishi belgilangan.
Belgilangan muddat yakuniga qadar pulning haqiqiy egasi topilmadi va hech qanday da’vo arizasi kelib tushmadi. Shu sababli, mahalliy hokimiyat organlari tomonidan ushbu mablag‘ga egalik qilish huquqi uni topgan 60 yoshli fuqaroga rasman berildi.
Ushbu voqea jamoatchilik orasida keng muhokamalarga sabab bo‘lib, topilmaning kelib chiqishi va nima uchun chiqindi qopiga tashlab ketilgani hamon noma’lumligicha qolmoqda.
Izohlar
0