Fenwick and West firmasi FTX jabrlanuvchilariga 54 million dollar to‘laydi

FTX kriptovalyuta birjasiga yuridik xizmatlar ko‘rsatgan Fenwick & West LLP kompaniyasi 2023-yilda mijozlar tomonidan qo‘zg‘atilgan jamoaviy da’voni hal qilish bo‘yicha 54 million dollar miqdorida tovon to‘lash majburiyatini oldi. Bu haqda Zamin.uz xabar berdi.

Cointelegraph.com nashri tarqatgan ma’lumotlarga ko‘ra, mazkur yuridik firma FTX tomonidan amalga oshirilgan firibgarlik sxemalarida ko‘maklashganlikda va noqonuniy moliyaviy amaliyotlarni yashirishda ishtirok etganlikda ayblanmoqda. Silikon vodiysida faoliyat yurituvchi mazkur kompaniya mijozlar mablag‘larining noto‘g‘ri taqsimlanishini yashirish, jumladan, birja va uning savdo bo‘linmasi Alameda Research o‘rtasidagi shubhali o‘tkazmalarni qonuniy ko‘rsatish uchun maxsus strategiyalarni ishlab chiqqan.

Shuningdek, yuridik maslahatchilar birjaning pul o‘tkazmalari litsenziyalarini olish majburiyatidan qochishiga yordam beruvchi murakkab sxemalarni yaratgan. Dastlab Fenwick & West o‘ziga qo‘yilgan ayblovlarni rad etgan bo‘lsa-da, joriy yilning fevral oyida tomonlar kelishuvga erishdi.

Endilikda ushbu kelishuv AQSH sudi tomonidan rasman tasdiqlanishi talab etiladi. Mazkur voqea 2022-yilda FTX birjasining qulashi ortidan boshlangan keng ko‘lamli huquqiy jarayonlarning bir qismi hisoblanadi.

Bu inqiroz kripto sanoatiga jiddiy zarar yetkazish bilan birga, AQSH regulyatorlarining soha ustidan nazoratni kuchaytirishiga turtki bo‘ldi. Hozirgi kunda FTX Recovery Trust aktivlarni kreditorlar va mijozlarga taqsimlash ishlarini olib bormoqda, biroq jarayon shaffofligi yuzasidan ko‘plab e’tirozlar mavjud.

Xususan, aktivlarning bozor qiymatidan sezilarli darajada past narxlarda sotilgani, masalan, 2023-yilda Cursor sun’iy intellekt kompaniyasidagi 5 foizlik ulushning 200 ming dollarga baholangani mijozlar tomonidan keskin tanqid qilinmoqda, holbuki kelajakda ushbu ulushning qiymati qisqa vaqt ichida milliardlab dollarga yetishi prognoz qilingan edi.