Mastercard Nyu-Yorkda kripto operatsiyalari uchun litsenziya qo‘lga kiritdi

Mastercard kompaniyasining AQSHdagi tranzaksiya xizmatlari bo‘linmasi Nyu-York shtati moliyaviy xizmatlar departamenti (NYDFS) tomonidan taqdim etiladigan BitLicense litsenziyasiga ega bo‘ldi. Bu haqda Zamin.uz xabar berdi.

Ushbu ruxsatnoma to‘lov tizimi operatoriga shtat hududida raqamli aktivlar bilan bog‘liq tartibga solinadigan moliyaviy faoliyatni amalga oshirish huquqini beradi. Cointelegraph.com nashrining ma’lum qilishicha, garchi kompaniya litsenziya qo‘lga kiritilganini rasman tasdiqlagan bo‘lsa-da, hozircha mijozlar uchun maxsus kripto-mahsulotlar joriy etilmagan.

Mastercard vakillarining bildirishicha, kompaniya o‘z strategiyasini raqamli aktivlar infratuzilmasini mustahkamlashga qaratadi. Bunda asosiy e’tibor stablecoinlar va tokenizatsiya qilingan depozitlar bilan ishlashga qaratiladi.

Nyu-Yorkdagi BitLicense tizimi AQSHdagi eng qat’iy kripto-tartibga solish mexanizmlaridan biri sanaladi. Mastercard ushbu litsenziyani olgan Galaxy va Strike kabi yirik bozor ishtirokchilari qatoriga qo‘shildi.

Eslatib o‘tamiz, joriy yilning fevral oyida MetaMask hamkorlikda foydalanuvchilarga kripto-aktivlarni bevosita hamyonlardan sarflash imkonini beruvchi yechimni taqdim etgan edi. Mazkur yangilik Mastercard kompaniyasining 1,8 milliard dollarga baholangan BVNK stablecoin infratuzilma kompaniyasini sotib olishi ortidan yuz berdi.

Ushbu xarid an’anaviy to‘lov tarmoqlari va blokcheyn texnologiyalari o‘rtasidagi integratsiyani kuchaytirishga xizmat qiladi. Bundan tashqari, joriy oyda Mastercard XRP Ledger tarmog‘i orqali AQSH g‘aznachilik obligatsiyalari bilan ilk transchegaraviy operatsiyani amalga oshirdi.

Hozirgi kunda stablecoinlarni hisobga olmaganda, global tokenizatsiya bozori 33,8 milliard dollardan ortiq qiymatni tashkil etmoqda.