Xitoy bojxona xizmati xodimlari davlat chegarasini noqonuniy yo‘l bilan kesib o‘tishga uringan to‘rt nafar ayolni qo‘lga oldi. Bu haqda Zamin.uz xabar berdi.
Tekshiruv jarayonida mazkur shaxslar o‘zlari bilan jami 225 dona ozdiruvchi ta’sirga ega in’eksiya vositalarini yashirincha olib o‘tishga uringani aniqlandi. Huquq-tartibot organlari ma’lumotlariga ko‘ra, ayollar taqiqlangan tibbiy preparatlarni kiyimlarining cho‘ntaklariga hamda paypoqlari ichiga mohirlik bilan yashirgan.
Bojxona nazorati punktida xodimlarning diqqatini gumonlanuvchilarning o‘zini tutishi tortgan. Ayollar keng bichimdagi shimlarda harakatlanib, boshlarini quyi solgan holda nazoratchilar bilan ko‘z to‘qnashtirishdan qochishga uringan.
Aynan shu shubhali xatti-harakatlar xodimlarni ularni to‘xtatishga va chuqurlashtirilgan ko‘rikdan o‘tkazishga undagan. Dastlabki surishtiruvlar davomida yo‘lovchilarning hech biri o‘zlari bilan olib o‘tayotgan ozdiruvchi in’eksiyalar uchun tegishli ruxsatnoma yoki tibbiy hujjatlarga ega emasligi ma’lum bo‘ldi.
Hozirda ushbu holat yuzasidan tegishli tartibda surishtiruv ishlari olib borilmoqda.
Izohlar
0