AQSh Eron bo'yicha operatsiyalarni qo'llab-quvvatlamagan NATO ittifoqchilariga nisbatan chora ko'radi
Pentagon AQShning Eron bilan bog'liq harbiy harakatlarida ishtirok etishdan bosh tortgan NATO a'zolariga nisbatan jazo choralarini tayyorlamoqqda. Bu haqda Zamin.uz xabar berdi. Reuters agentligi ma'lumotlariga ko'ra, taklif etilayotgan choralar orasida Ispaniyaning alyansdagi a'zoligini vaqtincha to'xtatish imkoniyati ko'rib chiqilmoqda. Shuningdek, Vashington "muammoli" hisoblangan davlatlar vakillarini NATOdagi yuqori lavozimlardan chetlatish va Folklend orollari bo'yicha o'z pozitsiyasini o'zgartirishni rejalashtirgan.
Ushbu ma'lumotlarni Dw.com nashri tasdiqladi. Ispaniya hukumati o'z hududidagi harbiy ob'ektlar va havo hududidan Eronga zarba berish uchun foydalanishga ruxsat bermagani Oq uyning e'tiroziga sabab bo'ldi.
Pentagon ichki hujjatlarida Ispaniyaning alyansdan chetlatilishi harbiy amaliyotlarga jiddiy ta'sir qilmasligi, biroq bu siyosiy jihatdan kuchli signal bo'lishi qayd etilgan. Bunday qaror kuchga kirishi uchun NATOga a'zo barcha 32 davlat bir ovozdan rozilik berishi shart.
Ispaniya Bosh vaziri Pedro Sanches YeOII sammitida Madrid ittifoqchilik majburiyatlariga sodiqligini, biroq hamkorlik faqat xalqaro huquq normalari doirasida bo'lishi kerakligini bildirdi. Germaniya hukumati esa Ispaniyaning alyansdagi maqomini qayta ko'rib chiqish uchun asoslar mavjud emasligini ma'lum qildi.
Avvalroq Oq uy ittifoqchilarni Eron kampaniyasiga munosabatiga qarab "yaxshi" va "yomon" guruhlarga ajratgani haqida xabarlar tarqalgan edi. Shuningdek, AQSh mudofaa xarajatlarini YaIMning 5 % miqdoriga yetkazmagan davlatlarni ovoz berish huquqidan mahrum qilish masalasini ham o'rganmoqda.
