Melburnda ko‘prik minorasiga rasm chizgan graffitichi qo‘lga olindi

Avstraliyaning Melburn shahrida jamoat tartibini buzish bilan bog‘liq noodatiy hodisa qayd etildi. Bu haqda Zamin.uz xabar berdi.

Reuters agentligi tarqatgan xabarga ko‘ra, graffiti san’ati bilan shug‘ullanuvchi shaxs 140 metr balandlikdagi Bolte Bridge ko‘prigining minorasiga ruxsatsiz ko‘tarilib, u yerda multfilm qahramoni tasvirlangan surat chizgan. Ushbu qilmishi ortidan huquq-tartibot organlari xodimlari tomonidan qo‘lga olindi.

Ma’lumotlarga qaraganda, shahar markaziga yaqin hududda joylashgan mazkur inshootdagi holat ijtimoiy tarmoqlar, xususan, Instagram platformasi orqali keng tarqalgan videolarda aks etgan. Videotasvirlarda erkak kishining ko‘prik minorasining eng yuqori qismida xavfli holatda bo‘lganini ko‘rish mumkin.

Hozirda tegishli idoralar tomonidan mazkur holat yuzasidan surishtiruv ishlari olib borilmoqda. Shahar ma’muriyati ushbu ko‘prik strategik ahamiyatga ega inshoot ekanligini ta’kidlab, xavfsizlik qoidalariga rioya etish muhimligini eslatdi.

Rassomning harakatlari ko‘plab muhokamalarga sabab bo‘lib, jamoatchilikda xavfsizlik choralarining yetarliligi borasida savollar tug‘dirmoqda.