Liviya sohillarida 404 nafar migrant qutqarildi
Liviya sohillari yaqinida dengizda qiyin ahvolda qolgan yuzlab migrantlar xavfsiz hududga olib chiqildi. Bu haqda Zamin.uz xabar berdi. Bu haqda Reuters agentligi ma'lumot tarqatdi. Xabarga ko'ra, mamlakat milliy armiyasining sohil qo'riqlash xizmati xavfli vaziyatga tushib qolgan 10 ta qayiqdan jami 404 nafar shaxsni qutqargan.
Tobruk shahridagi Qizil Yarim oy jamiyati ko'ngillilari turli millat vakillaridan iborat bo'lgan ushbu migrantlarga birinchi tibbiy yordam ko'rsatdi. Shuningdek, qutqarilganlar issiq kiyim va oziq-ovqat mahsulotlari bilan ta'minlangan.
Hozirgi vaqtda Liviya Afrikadan Yevropa davlatlariga o'tishni maqsad qilgan migrantlar uchun eng asosiy tranzit hududlaridan biri bo'lib qolmoqda. Ta'kidlash joizki, mazkur mintaqada avvalroq ham migrantlar bo'lgan qayiq ag'darilib ketishi oqibatida insonlar halok bo'lgani va bedarak yo'qolgani haqida xabarlar berilgan edi.
Hududda noqonuniy migratsiya bilan bog'liq xavfli holatlar muntazam ravishda kuzatilmoqda.
