AQShning Eronga qarshi harbiy amaliyotlari 61 mlrd dollardan qimmatga tushdi
AQShning Eronga qarshi olib borayotgan harbiy harakatlari mamlakat byudjeti uchun yirik moliyaviy yukka aylanmoqda. Bu haqda Zamin.uz xabar berdi. Iran War Cost Tracker portali ma'lumotlariga ko'ra, 55 kunlik operatsiyalar davomida 61 mlrd dollardan ortiq mablag' sarflandi. Ayni paytda AQSh g'aznasidan ushbu maqsadlar uchun har soniyada o'rtacha 11,5 ming dollar miqdorida mablag' yo'naltirilmoqda.
Mazkur tahliliy ko'rsatkichlar harbiy kuchlarning joylashuvi, kemalar ta'minoti va logistika xarajatlarini inobatga olgan holda muntazam yangilanib boriladi. Hisob-kitoblar Pentagonning Kongressga taqdim etgan rasmiy hisobotlariga tayanadi.
Hujjatlarga ko'ra, harbiy harakatlarning dastlabki 6 kunida 11,3 mlrd dollar sarflangan edi. Keyingi bosqichda esa kunlik xarajatlar miqdori taxminan 1 mlrd dollar atrofida bo'lishi prognoz qilingan.
Hozirda ushbu harbiy amaliyotlar AQShning tashqi siyosatdagi eng qimmat operatsiyalaridan biriga aylanmoqda.
