AQSh Mudofaa vazirligi Phantom robotlarini ishlab chiqarish uchun 24 mln dollar ajratdi
AQSh Mudofaa vazirligi Foundation Future Industries kompaniyasi bilan Phantom rusumli yuqori quvvatli odamsimon robotlarni yaratish bo'yicha 24 mln dollarlik kelishuvga erishdi. Bu haqda Zamin.uz xabar berdi. Vashingtondagi manbalarga tayanib FOX Business nashri tarqatgan ushbu ma'lumotni Inform.kz sayti ham tasdiqladi. Robototexnika sohasidagi mazkur startap AQSh prezidentining o'g'li Erik Tramp tomonidan qo'llab-quvvatlanmoqda.
Loyiha doirasida ishlab chiqilayotgan texnologiyalardan ko'zlangan asosiy maqsad Xitoy bilan global raqobatda ustunlikka erishishdir. Yangi avlod jangovar mashinalari dushman ob'ektlariga kirish va amerikalik harbiylar hayotini saqlab qolish uchun xizmat qiladi.
Kompaniya rahbari Sanket Patxak hamda strategiya bo'yicha maslahatchi Erik Tramp ushbu ishlanma AQShning jang maydonidagi mavqeyini mustahkamlashini ta'kidladi. Patxakning qayd etishicha, hozirda Xitoy ham yer usti va havo avtonomiyasi yo'nalishlarida shunga o'xshash texnologiyalar ustida jadal izlanishlar olib bormoqda.
Erik Tramp robotlarning imkoniyatlarini yuqori baholab, ular harbiy operatsiyalar o'tkazish tartibini butunlay o'zgartirishiga ishonch bildirdi. Phantom roboti 79 kg vaznga ega bo'lib, soniyasiga 1,7 metr tezlikda harakatlanish imkoniyatiga ega.
Ushbu universal texnologiyadan faqatgina mudofaa tizimida emas, balki qurilish sohasida hamda tabiiy ofat oqibatlarini bartaraf etish jarayonlarida ham foydalanish ko'zda tutilgan.
